الثلاثاء، 18 مارس 2014

كلام غريب بمناسبة عيد الام

 
رمضان شحاته

لاتتعالي علي آية من آيات الله في الأرض فيخسف بك الله الارض
...........
متعود علي اهانة مراتك ؟ هي طيبة ومتربية وعايزة تعيش ؟ شايفها منصب كبير في شغلها فبتعاملها بمهانه علشان تبان كبير ... ؟ تنتظر أول كل شهر علشان تأخد كل مرتبها .. ؟ جبار إنت ومن عيله أكبر من عيلتها ؟ وبتتعامل معاها علي هذا الأساس ؟طيب ماهو فيه اللي أكبر منك ومن أهلك وهيدفَّعك تمن الظلم ده .. تعرفه ؟ إس
مه جبار السماوات والارض .. تحب ترجع عن ظلمك واهانتك الدائمة لبنت الناس اللى ربنا بعتهالك أمانه ؟ ولا تحب يدفعك التمن اللى السبع اراضي هتكون في قبضته زي ورقة مطبّق عليها إيدك ؟ شايف ان أمك لايتحملها الجان ومع ذلك في كل مشكلة تنزل ضرب وصفع وإهانه ف مراتك وشايف إن ده رجوله وبر بأمك .. لا وحياة أمك .. دا ظلم ولا رجولة ولا بر .. ولو انت بر بأمك فعلا لاتهين مراتك وتظلمها علشانها لأن أكيد ربنا هينتقم منك أنت وأمك لو هي راضية بظلمك وتشجعك عليه .. مستني تشوف بنتك بكره في نفس الوضع .. عايشة كل أنواع الإهانه لنفس السبب .. مستبعد ده ؟ مش جايز ربنا سبحانه وتعالي يجازيك من جنس عملك ؟ هتسأل بغباوة وتقول أمال يعني اضرب أمي وأهنها ؟ دا سؤال غبي وخاطئ ومفيش إجابة صحيحة لسؤال غلط
مراتك برضو ماهي أم .. ولها أب بيتجن لما يعرف ان حضرتك ضربت بنته وأهنتها علشان خاطر أمك .. وليه شايف إن البر بأمك لايكتمل الا بإهانتك لزوجتك من أجلها ؟ طيب إيه العمل وحضرتك عشت جبار مستبد وظلمتها طول عشرتك معاها .. ؟ بسيطة .. تراجع عن غيك .. كرمها ومش عيب تخليها تسامحك ومش تخليها تسامحك وانت زي ماانت .. خليها تسامحك بحسن معاملتك .. لما تتصرف بعدل .. لما تحسسها إنك أهلها وعزوتها وعزها .. لما تعكس معاملتك لها .. أما إرضاء أمك دي مشكلتك إنت والبر بيها هيكون بر ازاي وهو قائم علي اهدار كرامة سيدة ممكن برضو تكون أم وسوء معاملتها ؟ العمر بينتهي ف لحظة يامعلم .. وصدقني أمك مش هتعرفك وانت مقابل رب كريم وانت ظالم حتي لو عشانها .. فإذا نفخ في الصور فلا أنساب بينهم يومئذ ولا يتساءلون .. صدق الله العظيم
أما إذا كنت تعاملها بغرور وكأنك تتفضل عليها لأنك باقي عليها لأنها ياحرام لاتنجب ومتحملة منك كل أنواع قلة الأدب والظلم والاهانه .. أحب أقوللك إنك ناقص وغبي .. وإنك بتهين آية من آيات الله في الأرض .. جعلها الله آية دالة علي قدرته ليحقق قوله تعالي ويجعل من يشاء عقيما .. وأكيد سبحانه هيعوضها يوم القيامه بما حرمت منه وأي ست هتشوف تعوبض ربنا ليها هتتمني لو كانت مكانها .. وما كانت أنجبت لتفوز بما فازت به .. ربك لايظلم أحدا .. لاتتعالي علي آية من آيات الله في الأرض فيخسف بك الله الارض
أما الإنسانة الي هي مش إنسانة وبتعامل حماتها بمهانه دا موضوع هنتكلم فيه بالتفصيل

رمضان شحاته
18/3/2014

ليست هناك تعليقات:

إرسال تعليق