الجمعة، 28 مارس 2014

وموت المَلك ... هوايته

انا هقوللك كلمة
وياريت يوصلك صوتي
ماتخافش م اللى رافضينك
وقالولك بعلو الصوت لأ
خاف من صُنَّاع الآلهة
اللى مايعرفوش كلمة لأ
اللى شغلتهم يصورولك الباطل حأ
اللى مش عايزينك تسمع غير سكوتي
واللى هديتهم ليك دايما .. موتي
خاف م اللي يسيبوا حمد ربهم
ويسبحو بحمدك
اللى نفسهم
 سيفك يصدي خوّا غمدك  
خاف وقت الظلم
تنشأ الأرض شا
ويخرج منها جند مش جندك
خاف م الشعب لو توعده
وماتوفيش بوعدك
لاأنت أغلي م اللى قبلك
وللا قبل اللى قبلك
ولا اللى جاي بعدك
خاف من شعب
متعرفش تقرا أفكاره
ولاتعرف جنته من ناره
والموضوع بقا بالنسباله
كش ملك .. مات
ومفيش كش وزير
يعني موت مفاجئ ومن سُكات
يعني الأمر خطير
خاف من شعب
معدش بيلعب استغماية
ولا التعلب فات فات
خاف من شعب فوق راية المُلك رايته
خاف من شعب
لاالجوع ولاالفقر عرفوا يكتبوا نهايته
والموضوع بقا بالنسباله لعبة شطرنج
وموت المَلك ... هوايته
...
رمضان شحاته
29/3/2014

ليست هناك تعليقات:

إرسال تعليق