الاثنين، 10 مارس 2014

احنا الجزمجية ...

رمضان شحاته

دا احنا الجزمجية ...
خيبتنا قوية ...
طول النهار ...
بنعافر
وحالنا يصعب ع الكافر ..
دايرين ..
من رجل ده لرجل ده ...
كل يوم ع الحال ده
والظاهر ..
علشان نعيش ..
لازم نعتصم ونتظاهر ..

ايه اللى خللاني ..
اسيب بلدي واسافر ...
واقعد القعدة ديّه
عيني ع الرايح والجاي
وشوف ازاي
ولاحد سائل فيا ...
واللى زاد البلية ...
العيال المتعلمة ..
والله بيصعبوا عليا
طب ماشي .. انا ...
لكن اللى اتعلم كااااام سنة ...
ليالي طويلة ...يذاكر ...
ويحلم ..
وينام ويفوق
واخرتها يشيل صندوق
والله اعلم ..
بيخزىَ .. وللا مايخزاشي
ينفع يابلد ...
كان ماأروعها ..
لما الولد ..
يخلص علام
و مايلقاشي ...
حتي جزمة يمسحها ... ؟!!!!
بقى دا اسمه كلام ؟!!!
هى دى آخرة العلام .. ؟!!!
يابلد ...
ماتكرمش غير اللى جرحها ...؟

وآه م النفس ...
لما تحس ...
ان مفيش غير اليأس ...
يجمعها .. ويطرحها
لا ..
والحكومة .. بنت اللذينا ..
مش مكفيها اللى عاملاه فينا
صابحة ترازينا
باعت المصانع
وقفلت المزارع
واسفلت ف كل شارع ..
ومنين هاييجي التراب للجزمة ؟!!!!
يعني معدش لينا لازمة

ايه ...
مستغرب ليه ... ؟!!
باقوللك ايه ..
انا راجع ..
لنجعي .. راجع ..
طول عمرى عايش هناك ..
حارث وزارع
...
حتي لو البلد دى .. هتشتريني ...
انا اللى بايع ...
 

ليست هناك تعليقات:

إرسال تعليق