الجمعة، 28 مارس 2014

خاف من شعب

 
رمضان شحاته
 
أنا هقوللك كلمة
وياريت يوصلك صوتي
ماتخافش م اللى رافضينك
وقالولك بعلو الصوت لأ
خاف مِن صُنَّاع الآلهة
اللى مايعرفوش كلمة لأ
اللى شغلتهم يصورولك الباطل حأ
اللى مش عايزينك تسمع غير سكوتي
واللى هديتهم ليك دايما .. موتي
خاف م اللي هيسيبوا حمد ربهم
ويسبحو بحمدك
اللى نفسهم
سيفك يصدي جوّا غمدك
خاف وقت الظلم
تنشأ الأرض شأ
ويخرج منها جند مش جندك
خاف م الشعب لو توعده
وماتوفيش بوعدك
لاأنت أغلي م اللى قبلك
وللا قبل اللى قبلك
ولا اللى جاي بعدك
خاف من شعب
متعرفش تقرا أفكاره
ولاتعرف جنته من ناره
والموضوع بقا بالنسباله
كش ملك .. مات
ومفيش كش وزير
يعني موت مفاجئ ومن سُكات
يعني الأمر خطير
خاف من شعب
فوق راية المُلك رايته
خاف من شعب
لاالجوع ولاالفقر عرفوا يكتبوا نهايته
والموضوع بقا بالنسباله لعبة شطرنج
وموت المَلك ... هوايته

ليست هناك تعليقات:

إرسال تعليق