الأحد، 18 مايو 2014

قرآن جديد .. قرآن فيسبوكي


رمضان شحاته

قرآن جديد .. قرآن فيسبوكي 
....
للصديق والصديقة اللى زعلوا مني لاني قلت لهما لايصح إقتباس آية من القرآن أو نصف آيه وتحويلها لبيت شعر .. لكل من يكتب .. لكل الأصدقاء .. أتمنى أعرف رأيكم في هذا .. 
قالت الشاعرة 
وان سألك قلبي عني, فاني قريبة منك.. ألبي دعوة الشوق اليك..!
تحريفا لقول الله تعالي 
{وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ}[البقرة: 186].
..
من يرى منكم أن هذا إبداع أو شعر فليقل لي أنه كذلك 
والذي يري أنه شعر وابداع وفعل حميد يقل رأيه في هذه الردود علي المنشور التي سوف أحذف إسم اصحابها 
..
هو الحب لا شريك له هههههههه
طبعا الموضوع مش محتاج أقوللكم دا تحريف لإيه 
شوفوا هذا التعليق 
ونادت في الظلمات.. اني مغلوبة فانتصر!! قلت سَمِعْنَا وَأَطَعْنَا لا حياء في الرفق. 
أنظروا هذا تحريف لكم آية 
وَذَا النُّونِ إِذْ ذَهَبَ مُغَاضِبًا فَظَنَّ أَنْ لَنْ نَقْدِرَ عَلَيْهِ فَنَادَىٰ فِي الظُّلُمَاتِ أَنْ لَا إِلَٰهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ" الأنبياء 87 "
وهذه الآية ايضا
فدعا ربه أني مغلوب فانتصر ففتحنا أبواب السماء بماء منهمر
وهذه أيضا 
ص 182
(إِنَّمَا كَانَ قَوْلَ الْمُؤْمِنِينَ إِذَا دُعُوا إِلَى اللَّهِ وَرَسُولِهِ لِيَحْكُمَ بَيْنَهُمْ أَن يَقُولُوا سَمِعْنَا وَأَطَعْنَا وَأُولئِكَ هُمُ الْمُفْلِحُونَ) [النور: 51].
أنظروا آية محرفة بمنتهي الجرأة حولتها الشاعرة لبيت شعر أتبعها كردود التحريفات التي عرضتها عليكم ردود قيلت يصحبها ضحكات وبمنتهي البساطة 
ثلاث آيات محرفات جمعهم القارئ في تعليق واحد ليرد عي آية محرفة اصبحت بيت شعر 
وتحريف صارخ ماجن ليناسب التحريف المنشور كبيت شعر بدلا من الشهادة .. بدلا من قول لا اله الا الله وحده لاشريك له قالوا الحب لاشريك له 
وهذا رد ايضا
حرام عليكي تشبهي كلامك بكلام الله تعالى
..... 
هذه نوعيه من الرودو وليست كلها 
أي مجتمع عربي هذا .. لا أقول أي مجتمع مسلم هذا 
وللأمانة سأعرض ردها علي الرجل الذي قال لها حرام عليكي 
هذا ردها 
القرآن الكريم هو المصدر الاول لعلوم اللغة ..منه نستمد قوتنا اللغوية والبلاغيةو.....نطور اسلوبنا وحمولتنا المعرفية والمعجمية ...ويحدث ونحن نقرا الايات ونتاملها ان نتاثر بها فتوحي لنا ..دون ان بمس ذلك بقدسية ومكانة كتاب الله تعالى
..
تعتبر تحريفها للآية انها تستمد قوتها اللغوية والبلاغية .. فتحها الباب لردود كتلك وترحيبها بها استحضار لغتها وبلاغتها من القرآن 
ومن هذا المنطلق قال يوما أحدهم 
واذا الحبيبة سئلت بأي ذنب هجرت
كان يستمد قوته البلاغية واللغوية من الاية الكريمة 
{ وَإِذَا الْمَوْءُودَةُ سُئِلَتْ بِأَيِّ ذَنْبٍ قُتِلَتْ }
والآخر قال 
سبحان الذي اسري بكلماته ... يقصد شاعرا يهجوه
كان يستمد قوته البلاغية من قوله تعالي 
سُبْحَانَ الَّذِي أَسْرَى بِعَبْدِهِ لَيْلاً مِنَ المَسْجِدِ الحَرَامِ
قلت له أيها الشاعر سبحان كلمة لاتقال الا لله .. هي وحدها جريمة لتهجو او تمدح بها بشرا .. طبعا الادمن والشاعر والجروب كان ضد رأيي 
وما رأيكم فيمن استمد بلاغته وقوته اللغوية في نصف سورة الكهف تخيل تقرأ سورة الكهف علي وزن ماسبق 
حين اجد الكلام سوف انشره فقد نشرته قبلا هنا 

هذا تغيير لبعض المفردات في آية للاحتفاظ بنغمة .. يلوون عنق الآية ليحولوها من آية قرآنية لبيت شعر 
ماأنزل الله القرآن لهذا .. إنما كان لهدف أسمى 
ياشاعر الابداع ان تبتكر جملا وتركيبات جمل وصيَغ خاصة بك 
تخيل لو أن احدهم أخذ نصاً لنزار قباني وحرف فيه وبدل بعض الكلمات ونشرها بإسمه .. ماذا سيكون رد فعل احباب نزار .. حتما سيقلبون الدنيا علي رأسه 
والسؤال الأخير أين الإبداع في أخذ آية وتحريفها وتحويلها لبيت شعر ؟ وما رأيكم في هذا القرآن الفيس بوكي 

السبت، 17 مايو 2014

ساكت وراضى بأيامُه

يااااه ع النَّظرة اللي ف عنيه
محتاج
ومن الألم .. ينعصِر
ونفسه تعِز عليه ..
أنه ينحني وينكِسِر
و يمد للخلق اإيديه ..

ساكت وراضى بأيامُه
وملقاش قدامُه
غير إنه يبيع
اللي محدش محتاح يشتريه

بايدك تخفف عنه ..
وتشترى منه
حتي لو اللى هتشتريه ... هترميه
 

شوفي عرّفتك كم حاجة ؟

شوفي عرّفتك كم حاجة ؟
لكن جنب اللى عرفته منك ولاحاجة
علشان الطيبة اللى إتعلمتها منك أكبر من كل حاجة

بحبك وبحب صباحك

بحبك وبحب صباحك

وبحب أسكن فـِ براحك

وبحب اشوفك سعيدة

نجمة بتلالي ف سماكي الجديدة

وضحكتك نور ف افراحك


بحبك شمس بتمحي الليل

وراحة بعد التعب والويل

بحبك وانت بطعم السكر

ماي صافي مش متعكّر

عذبة زي نهر الليل

بحب طيبتك وسماحك

ياأم قلب طيب وجميل

بحبك وبحب صباحك

وهموت عايش ف براحك
 

عجايب سوق الجمعة

عجايب سوق الجمعة
1
...
سوق الجمعة عالم ماليه الغرابه
فيه الطيبين اوي اللى ف منتهي السذاجة
وفيه الدِّيابة

لكن أغرب ماتلاقيه
ست عجوزة آخر تلاتين حاجة
مخلاِّش الزمان فيها ولا حاجة
لاجسم ولا طول ولا عرض
فارشة جورنال ع الارض
وعليه فردة شبشب واحدة
تبص ف وشها تفرح
رضا ونور ماتعرفلوش سبب
وضحكة ليها العجب
كأن الحزن مالوش عندها مطرح
وعلامة الصلا ف وشها
كأنها قضّت عمرها .. ساجدة
مش الغريب انها بتبيع فردة شبشب .. واحدة
الغريب راجلين طيبين
كل واحد راسه وألف سيف
يشترى فردة الشبشب .. الواحدة
وهي تضحك وتحمد ربها وقاعدة

الراجل حلف ميت طلاق يشترى الفردة
ولو بميت جنيه
والست مبتسمه باصّة للسما
دا كتير أوى ياربنا
طلّع الراجل فلوسه
ورماها ف حجرها
وقاللها وانت بتكلمي ربك كده .. ادعيلي
خلليه يرضي عني
قالت له
هتشوف منام يرضيك الليلادي يابني
ربي يراضيك زي مارضتني
حط فردة الشبشب في جيب البدلة الجواني
والتاني ..
اللى معرفش يشتريها
راح ليها
قاللها خدي دُول يامّه
قالت له لأ خلاص
ربنا رضاني
الحمد لله
دوّر يابني هتلاقي ناس
محتاجة جنيه ومش لاقياه
إسأل علي عمك عباس
هتلاقيه فارش هناك
عمره مامد اديه
هتلاقي عنده اللى تشتريه
روح ربنا معاك
ويحنن عليه
...

في سوق الجمعه
كتير حاجات
هقوللكم ايه وللا إيه

خندق .. يادوب علي أدُّه

خندق .. يادوب علي أدُّه
والبندقة .. جنبه ..
والقرآن في يدُّه
وحالف لياخد بـ تار
ويغسل عار
مع أن .. الذنب مكنش ذنبه
لكن .. البلد .. بلدُه
وف قلبُه

فـِ اكتوبر ..
محَى سواد الليل
ووفُّى بوعدُه
ياسعدُه
بعد جحيم الإنتظار
عدَّى وخلق نهار ..
للي جاي بعدُه
لوِّن مجرى القناه بدمُّه ..
ولا همُّه

كانوا كلهم لمصر خَدَم
ومحسباهش بالورقة والقلم
ولاتاجر بألمُه
أصله كان عارف إن البلد دى ..
تبقَى امُّه
 
صورة: ‏خندق .. يادوب علي أدُّه
والبندقة .. جنبه ..
والقرآن في يدُّه
وحالف لياخد بـ تار
ويغسل عار
مع أن .. الذنب مكنش ذنبه
لكن .. البلد .. بلدُه
وف قلبُه

فـِ اكتوبر ..
محَى سواد الليل
ووفُّى بوعدُه
ياسعدُه
بعد جحيم الإنتظار
عدَّى وخلق نهار .. 
للي جاي بعدُه
لوِّن مجرى القناه بدمُّه ..
ولا همُّه

كانوا كلهم لمصر خَدَم
ومحسباهش بالورقة والقلم
ولاتاجر بألمُه
أصله كان عارف إن البلد دى ..
تبقَى امُّه‏

إنت كل الكون

 ‏رمضان شحاته‏ ‏

أنا اللي أسيرك .. وبحُبِّك مجنون ..
ولو مابقاش فِ الكون غيرك .. إنت كل الكون
 

صحيح ب تِفرق شويه .. إزاي مات

رمضان شحاته

صحيح ب تِفرق شويه .. إزاي مات
مات علشان بلد وهوَّ عالي الصوت
ولّا .. مات لنفسه .. ومن سُكات ؟
صحيح بتفرق إزاي مات
لكن مهما كان شكل الموت
حتي لو شهيد سابح ف الملكوت
الموت .. موت
فراق بيقتل ف النفس حاجات

تيجي تضحك تزعل من نفسك
ويحاول يصاحبك حزنك و يأسك
وتلاقيك مهموم أوي
وحابب تكون وحدك وتنطوى
والكون البراح
معدش براح
والحياة أشبه بالممات
تبكي شويه
وكأنك بتقولله .. لو ضحكت سماح
تصبّر نفسك
لما جوّاك يقوللك
إن شاء الله ف الجنّة ..
وتتمنى ..
يجيك ف المنام سعيد مرتاح
..
حياه أو موت
أهي دنيا وهتفوت ..

زي كل اللي فات .. وراح
وكأنك بتقولله .. لو ضحكت سماح
تصبّر نفسك
لما جوّاك يقوللك
إن شاء الله ف الجنّة ..
وتتمنى ..
يجيك ف المنام سعيد مرتاح
..
حياه أو موت
أهي دنيا وهتفوت ..
زي كل اللي فات .. وراح

وإذ أتاك المشيب وتخلّى عنك وقارك فرجاءً إلتزم الصمت ولاتبرح عتبة دارك

وإذ أتاك المشيب وتخلّى عنك وقارك
فرجاءً إلتزم الصمت ولاتبرح عتبة دارك

مش لازم نموت

مش لازم سبب نعرفه علشان نعيش
مش لازم الحياة تقف
ونفضل نقول للأسف
علشان اللى حلمنا بيه مابيجيش
مش لازم نموت
ونندفن ف السكوت
علشان كل أمل نصنعه
ييجي اللى يضيّعه
وندوّر عليه مانلاقيش
مش لازم نبكي بصوت
ومن غير صوت
وماتفرقش
لو بكانا حد يسمعه
أو مفيش

ومهما كات الظروف
مهما كان الخوف
مستمرة مابتنتهيش
دنيا وماليها العجب
ومش محتاجة سبب
علشان تبقي جواها
وفجأة تلاقيك براها

م الآخر .. ماتساويش
..

إلي متي تهبيني عمرك ؟

تتأمل محياها .. تزحف السنون بغدر الي ملامحها .. تقترب من الثلاثين .. أنهت دراسة الطب .. ولم يتقدم أحد .. راحت تعجب وتبحث عن سبب كي يحجم الخطاب عنها .. تتأمل وجهها بإمعان شديد .. كأن زميلتها الضاحكة دائما شاركتها فجأة المرآه .. تهتف بها .. لاتتعجبين ثم عدّت لها عشرات البنات الجميلات رائعات الخلقة والخلق كلهن مثلنا يبحثن عن نفس السبب .. تطن في رأسها كلمات جدتها .. أخشي أن تأخذي حظ أمك السيء ..
ياللأم الرائعة .. رحل عنها الزوج .. صارت اصغر أرملة .. لم تكمل العشرين .. إختفت خلف نقاب ارتدته بعد وفاة الزوج .. إحتمت به من كل العيون .. أتمت الأم الخمسين ولم تزل مختفية خلف نقابها .. سألت نفسها ذات السؤال الذي ماعرفت له يوما اجابة .. كيف لبنت العشرين أن تهب حياتها لجنين في بطنها .. كيف تهب باقي عمرها لإبنتها .. أزعجها طرقات الباب .. أذن هي جارتنا التي بينها وبين جرس الباب عداوة .. فتحت لها .. وبنفور رحبت بها .. هي تعرف لمَ حضورها .. تظن الأم أن الإبنة لاتعرف سبب زيارات الجارة المتكررة .. سمعت الام تكاد تصرخ في حديثها مع الجارة .. تحدثها بثورة مكتومة ..
- ألا تملين من هذا .. لم ارض بالزواج وأنا بنت العشرين هل أرضاه الآن ..
ردت الجارة بتحدٍ غبي ..
- كنت مسئولة عن إبنتك .. الآن هي طبيبة .. وأخي ماملَّ .. مانسيكِ ..
لم تتعمد الابنة الإنصات .. ربما صار عاديا أن تقف بالقرب لترى الشيء العجيب .. أم يطرق بابها الخطاب وإبنه لايطرق بابها أحد ..
- وما شأني برجل لم ير وجهي منذ ثلاثين سنة .. ثم أتبعت كلامها بصرخة تنادي إبنتها ..
حضرت الإبنة ترنو للأم
ماأبهاكي من أم وما أجملك حقاً .. ترى من فينا الأكبر .. تحادث نفسها الابنة ..
- أوصليها للباب ..
هتفت الأم بإبنتها وسط ذهول الجارة وذهولها
- أوَصَل الأمر لطردي ؟!!
- نعم أنت أوصلته لهذا
خرجت واإغلقت الباب خلفها .. أسندت ظهرها علي الباب .. الأم تتحاشى رؤية الإبنة .. أما الإبنة فراحت تحتضن الأم الأقرب للأخت
همهمت بكلمات لم تتبينها الأم
- إلي متي تهبيني عمرك ؟
- ماذا ؟
ردت الإبنة .. لاشيء

شايل حمولة جمل

شايل حمولة جمل ...
لمّا انحني ضهرى ..
ولا قلت آه ولاهمني
ولا نفد صبري
بس مرة
إتمنيت قبري يضمني
وقتلني قهري
لما جيت أشيل مقدرتش ..
قام واحد حط ف إيدي حتّه بخمسة
جيت أقول لأ .. أنا لسّه ....
بس معرفتش

أكتر من ستين سنة .. عمرى
وكانت دى أول مرة ..
أشتهي قبري
لما لقيته حط ف إيدي الحتّه ام خمسة
وأنا قادر لسه ...
أشيل علي ضهرى
 

       

فوق راية المُلك رايتُه

رمضان شحاته
17/5/2014

واعملوا حساب لِـ شعب 
فوق راية المُلك رايتُه
لا الجوع ولا الفقر .. 
عِرفوا يكتبوا نهايتُه
والموضوع بقا بالنِّسبالُه لعبة شطرنج 
ومُوت المَلِك .. هوايتُه