وصية شهيد

رمضان شحاته

قاللي وباين فى الكلام ألمه
بتعرف تكتب ؟
طب اكتب عن صاحبي اللى مات ولاهمه
تصور ... هموت أنا م الكسوف
كان كتفي ف كتفه
كل واحد روحه علي كفه
بنهتف سوا وبنلعن زمن الخوف
زمن الحر اللى راح ولاجاش
كنا سوا بنلعن زمن السكوت
استشهد جنبي
عاش هو ... وسابني أموت
أصل الشهاده ماينولهاش
الا القريب أوى من ربه
مع انى كنت والله جنبه
أصلك متعرفش
دى حالة متتوصفش
صاحبك لما ف لحظة يبقى شهيد
وكان مستني معاك العيد
والدم بينزف من جسمه
وشمسه خلاص بتغرب
يموت مع اذان المغرب
ولسه مصلي معانا العصر
وهدومك مليانه بدمه
بدل مايوصيك علي امه
بيوصيك علي مصر
لما يموت علي ايدك
وعينه ف عينك
يمسك تراب عليه شوية دم .... منه
ومع انه...
خلاص بيموت
لكن يقوللك وحياة ده ... ماتنساش
تضحك تاني ازاي
ولاحتى تتهني بكباية شاى
وللا ترجع تاني للسكوت
قبل اما تحقق حلمه
وتحافظ أوى علي دمه
انه أبداً مايروحش بلاش
....
...
ياأستاذ قول للناس .. ماتنساش