" مين اللى لازم يتحاكم"

مع انى مخلوق انسان
بس ولاد الايه
حطونى فى كهف جوه سرداب
علمونى ان النور سراب
فهمونى انى خفاش........ مش انسان
وان الظلام والكهف الاسود...... عنوان
علمونى انى تمثال شمع
لو شفت الشمس ..... هسيح
شالوا منى الاحساس
حتى شالوا الدمع
وحطوا لى كل شئ....... قبيح
مخلوش فيا بنى ادم
بقيت مجرد خادم
للى قال انا نصف اله
واللى فال انا الحاكم
........
مين اللى لازم يتحاكم ؟
انا اللى صدقت ورضيت بالظلم الغاشم ؟
انا اللى مالعنت السكوت الظالم ؟
مين اللى لازم يتحاكم ؟
اللى قال..... وللا اللى سمع ؟
واللى كل جريمته انه طمع
يخرج من كهفه
من سردابه
نفسه يشوف كفه
فى نور الخالق
يبص في عين الشمس..... ولو حارق
يحول للحقيقة سرابه
. ................
مين اللى لازم يتحاكم ؟
اللى منع نور الشمس ؟
اللى حرم حتى الهمس ؟
اللى قال ممنوع اللمس ؟
أو الاقتراب من الحاكم ؟
وللا اللى عَبَدْ الحاكم من دون الله الحاكم ؟
مين اللى لازم يتحاكم ؟
اللى قال مصر ليا
بشمسها بنيلها وجبالها ... وشويه عليا ؟
اللى قال أنا الاعظم وانا الاعلى ؟
وللا اللى عظمه وعللاه ؟
ومجده وقدسه
ونسى الرب ف علاه ؟
...............
اهه كله زال..... والشمس هى هى
وآدى نسايم الحريه
مد ايدك
اوعى تخاف على ايدك تتحرق
اوعى تخاف على روحك تتخنق
خدلك م الشمس شويه
............
لو رحنا الف
ورجعنا ميه
دا تمن رخيص وشويه
للى رايح لعين الشمس
يشترى
وللا حتى ينزع نزع
شوية حرية

رمضان شحاته