النهارده يامصر..... لأ

رمضان شحاته

النهارده يامصر..... لأ
ثاروا ولادك ....ثورة حق
ورجعوا الضحكة لعنيكى
غابت كتير الضحكة عليكى
إضحكى للأمل اللى زى الفجر طالع
زى النبته مابتصارع
وتشق الأرض شق
اضحكى لصوت المكن ف المصانع
لصوت الجرس ف الكنايس
لضجة الاطفال فى المدارس
لصوت الاذان ف الجوامع
بيحرقوا شيطان الفتنة ... حرق
...........
اضحكى للامل اللى جاى
ف اديه ألف فجر وضَىْ
ياللى ضحكتك أجمل ألف مرة
من عزف الناى
اضحكى
مش هاتبكى تانى
اضحكى ضحكتك حلوة
زى الأغانى
ياللى ضحكتك غنوة
بكل المعانى
إضحكى
لايقة الضحكة عليكى
ووحياة عنيكى
ماهتبكي تانى