في قَطْر الدرجة التالتة ..

 

رمضان شحاته

2/3/2014

 

في قَطْر الدرجة التالتة ..

ناس تقدر ..

تقول عليها فالتة ..

ناس ماليها العلام ..

وتعرف معني الكلام ..

وناس جاهلة

وتلاقي ناس متفائلة ..

وناس رغم الشمس ..

من اليأس ...

شايفا الدنيا عاتمة ..

وناس ماليها الحكمة

وتلاقي ..

البساطة ..

والغتاتة ..

والمَرْجَلَة ..

والأونطة ..

وللّا اللّى شايل ..

علي كتفه خمس تلاف شنطة

وللّا بياع القازوزة ..

اللّى ألف لسان ف بوقُّه ..

واللى واقف قدامك ..

ونفسك تنزل ..

ومايتحركش مهما تزوقُّه..

واللى بيصرخ ف وشك ...

إوعىَ يابن آدم ...

تآمن للى يغشّك ..

واللى يقوللك ..

صلي ع النبي ..

هى دى مكسبي ..

ووحد الله يامؤمن ..

وبعدين يدِّيك ازازة ..

ويقوللك ..

فيها الشفا ..

من كل مرض مزمن

واللى رابط عينيه ..

يقوللك يابيه ..

ماتصلي ع الهادي ..

جنيه وللا نص جنيه ..

أصرفه علي ولادى ..

واللى يقوللك ..

ببشاشة ..

تسمح ياباشا..

ويقوم ساند علي كتفك ..

وف ثانية ..

تلاقيه إبن الإيه ..

بعين قوية ..

ع الرف قاعد

وجزمته قدام عينيك

مع كل هزة رايحة وجاية ..

زى بندول الساعة..

وانت كل اللى عليك

تمصمص شفايفك ..

تقول آه م السقاعة

وعمّال تبعد بوشك ..

وتتباعد

واللى راكع مكانه واللى ساجد ..

واللي بيسب الدين ..

واللى بيوحد الواحد

وكمسرى قاعد يناهد ..

مع ست مفترية ..

الست بتقولله ..

دى مسخرة..

وآخر إفترَا

عايز تقطع للواد تذكرة ؟

هو نص مفيش غيره ..

يقولها نص ازاى ياولية ..

تقولله هو كده ياعنياّ

وحوارات

من كل صنف ولون

ودرويش بيصرخ ..

وكأن صوته جاي .

من آخر الكُون ..

يقوللك ..

تزعل ازاى ...

ورب الوجود .. موجود ..

وكرمُه مالو حدود

لاتزعل ..

ولاتحمل هم

ولاتتغم

ويحلفلك ..

ورب الكون ..

هاتعَدِّي مهما تكون

هاتعدَّي مهما تكون

 

1أعجبني · · إيقاف الإشعارات · الترويج · مشاركة