البلد دي مش هيقدر عليها غير ربنا .. هو سيادتك ربنا ؟ !!!

1. • 

      

      

     رمضان شحاته

     14/3/2014
2. البلد دي مش هيقدر عليها غير ربنا .. هو سيادتك ربنا ؟ !!! ..............
   .......
   
   وانت متصور إن الجيش كده هيقع وبعدها مصر تقع ؟ الجيش ده مش قبَلي ولاطائفي .. يعني مستحيل تعرف تؤثر فيه .. سياسة قتل جنوده زي بالضيط كأنك كلفت نفسك وسافرت اسكندريه علشان تنشف بحرها وكل اللى معاك فنجان .. لو فاهم انك هتوقع الجيش او توقع مصر عن طرق الجيش تبقى فاهم غلط جدا ... الجيش حتي لو ظالم أوشايفه ظالم لكن غير قابل للسقوط .. لانه لايخترق أولا .. وثانيا يدين بالولاء للرتبه الأعلي دايما .. كلنا شوفنا موقف الجيش من الثورة .. لم نسمع عن كتيبة أو لواء أو سلاح من أسلحة الجيش يدين بالولاء لجمال مبارك مثلا .. أكيد إنت كنت شايف نفوذ جمال مبارك وسطوته في كل نواحي الحياه .. شوفت عز . وباقي الكبار .. لم نسمع إن لهم نفوذ في الجيش .. إلّا الجيش .. لو كان لهم نفوذ كان ده تم ترجمته ع الارض .. يعني ايه ؟ يعني تشوف طريقة تانية غير قتل الجنود اللى هم كل واحد منهم انه ينهي تجنيده ويطلع يشقى ويشوف فرصة للسفر أو الشغل علشان يتجوز ويشوف حياته لابتاع سياسة ولايهموا الساسة .. طيب أسألك سؤال .. لو العسكرى اللى انت أزهقت روحه لو أخوه ميعاد تجنيده نفس يوم وفاة اخوه .. تفتكر هايرفض يتجند ؟ لا .. بمزاجه وغصب عنه هيتجند .. الجيش ولايهمه ان اخوه مات إمبارح ولاحتي كل أهله .. وبعدين الجيش عنده عقيدة .. الجيش مش بيقف علي حد .. من أول القائد الاعلي والقائد العام حتي العسكرى المسكين اللى انت بتجاهد بقتله .. قتلت 50 الجيش عامل حسابه فيه 5000 بني آدم في 24 ساعه يكونوا عساكر .. هتقتل 5000 في خمسين الف جاهزين .. وللا انت فاكر ان الشعب هيثور ويخلع قادة الجيش .. معقول حد فهمك كده ؟ الجبش معندوش قلب .. والعسكرى ده ... الجيش بالنسبه له هو الاعلي رتبه منه اللى بياخد الاوامر منه ... والحلال والحرام ولاطاعه لمخلوق في معصية الخالق ده بره الجيش ... لاتعتمد علي هذا .. هتفكر في طريقة تانية تفجر مدرسة مثلا ولاتقتل بني آدمين علشان مثلا تعمل بلبلة وتقع الحكومة .. لا .. ماتتعبش نفسك .. أديك شايف تمن البني آدم عند الحكومة .. مفيش وزير هيستقيل علشان كارثة أو موت حد .. مش بعيد الحكومة ترد عليك تقوللك إحنا 90 مليون محتاجين ننقص 40 مليون علشان البلد تقف علي رجليها .. ماتحاولش مصر مابتقعش ... الانجليز والفرنسيين عوجوا لسان كل بلد احتلوها .. احنا لا .. اسلموا هنا وسموا نفسهم محمد وعبد الله .. البلد دي مش هيقدر عليها غير ربنا .. هو سيادتك ربنا ؟ !!!
   رمضان شحاته

   16/3/2014